ఇలా, యెలా?

ఇలా, యెలా?

మలయ మారుతపు పిలుపు

పట్టించుకో లేదు.

దూసుకొచ్చిన సుడిగాలిలో

తేలిపోనూ లేదు.

కొమ్మనే పట్టుకు

శిశిరం దాకా వేలాడి

ఒంటరి చెదలా రాలి పోవడం - ఇలా?

క్షణికమైనా , యెగసి పడి,

తుళ్ళి,తేలి,

గిరికీల పరవశత్వాన్ని మోసి

ఎవరి కంటా పడని

అడవి పువ్వైనా సరే,

పరిమళించడం ఓ అనుభవం!

అనుక్షణం క్షణ క్షణమై పరవశించడం ఓ వరం!!

మనసును వెలివేసిన బానిసలమై

శూన్యాడంబరాన్ని చుట్టుకుని,

నిత్య ఉదయాస్తమయాల మధ్య

వికసించక, వివసించక

జీవన్మరణాలమై,

ఇలా,యెలా?

జ్వలించని జీవితం మెరుపౌతుందా?

ఎగసి పడని ఉద్వేగం అల అవుతుందా?

అనుభూతి లేని అనుభవం జీవితమవుతుందా?

ఇన్నీ తెలిసి ఇలా జడంలా!,యెలా??

                                                       -విజయ బాబు,కోగంటి

(Published in Navya, Weekly on 13^th August 2008)